UWB heet uk: Kulturelles Engaaschment, uns Kark, uns Sprook, uns Klöönstuuv „ölven/96“!

Wat weer Sleswig-Holsteen, ganz Norddüütschland vun Westfolen över Nedersassen bet na Mecklenborg un grote Delen vun Brannenborg ahn de Regionalsprook Plattdüütsch. Ok wenn na utglekende Ünnersöckens blot 1/3 vun de dorigen Lüüt noch wat „native“ Plattdüüschten sünd, dat heet Platt snacken köönt, un 2/3 se man verstohn köönt, so höört de Sprook doch för All to uns to as de Wind, de Horizonte, en Fischbrötchen un dat Meer.

In dat fründliche, kommodige Plattdütsch sünd ok strengere, kontroverse Gespräken bannig wedder recht gedeihlich. De Nedderdüütsche Sprook is en levend Kulturgoot, dat wi erholen mööt un wöllt, denn de Sprook is identitätsstiftend! Dorüm süht die Sleswig-Holsteensche Lannesverfoten extra un binnend vör, dat se vun’t Land un all Amtslüüt föddert un gliekberechtigt to (Hoch-)Düütsch un de anner Minnerheiten- un Regionalsproken annohmen warrn schall.

Wi as UWB nehmt düsse Verplichtung eernst un wöllt uns för de Bewohren un Pleeg vun de Sprook insetten. Dorto hett de Gemeendevertretung in de verleden Johren al veel hulpen un en Masse op´e Weeg bröch.

So bringt Jörg Lahr ut Brekendörp siet eenige Tiet de Kinnergorden-Kinners jede Week Plattdüütsch bi. Un siet letz Johr gifft he junge Deerns un Bengels Plattdüütsch-Ünnerricht in uns „elf/96“ bzw. MarktTreff. Wi as Gemeende gifft Stütt un Stöhn för sien dulle Engagement un hett dorför Plattdüütsch-Lehrböker köff.

Wi wöllt man noch mehr anbeden un stellt uns plattdüütsche Klöön-, Lees- un Musikavenden in’n „elf/96“ vör. Dat uns Brekendörp nich blot riek an Natur, Sport un Gemeenschop is, man ok an Sproken, schall na uns ok mit tweesprokige Ortsschiller wiest warrn, so as dat de in mehr un mehr noordüütsche Gemeende un Städten, so ok in Eckernföör al gifft.

Dat is wiss blot allens en Beten, aver allens tosomen hölpt villicht dat uns Sprook vital blifft un viellicht dat’t sogor noch mehr un wiederdregen ward, düsse wichtige kulturelle Sook, uns Plattdüütsch. So wiet freut wi uns bannig, dat de „elf/96“ bzw. de MarktTreff na en Johr al so fein as Klööneck un Drooppunkt mit so veel verscheedene Soken annohmen worrn is.

Dor mööt wi bannig bi de Genossenschaft un ehre röhrigen un flietigen Hölper/innen Dank seggen.

In’t Wiedere sett wi uns as UWB, man ok de Gemeende, as schon all de Johren för de Fohrbökerien, de Däänsche as de Düütsche in un geevt beide jede Johr Geld dorto. Hier schull man ok vun’n nie’e Bökerautomat vun de Fohrbökerie SH in’n Vörruum vun „elf/96“ vertellen.

Un to allerletzt liggt uns as UWB en nie’e Glock för uns Kapell an’t Harten. Wie Ju all weet, is de oole al vele Johr twei un geiht nich mehr. Dat passt uns as UWB nich un dorüm hebbt wi de Kark bzw. de Pastorin 1000,- € dorför geven. Höpentlich hebbt wi bald en Nie’e!